گوجرہ موٹر وے پر دہل دہلا دینے والا واقعہ۔ بہتر مستقبل کا خواب سجانے کے لیے نکلی لڑکی درندہ صفت انسانوں کی بھینٹ چڑھ گئی۔ میڈیا رپورٹس کے مطابق ٹوبہ ٹیک سنگھ کی متاثرہ لڑکی کو خاتون کی جانب سے کال موصول ہوئی، جس نے اسے بوتیک کی نوکری کے انٹرویو کے لیے طلب کیا۔ لڑکی کو بتایا گیا کہ وہ گوجرہ پہنچ جائے، جس پر اُس نے رشتے دار خاتون کو ساتھ لے کر ٹوبہ ٹیک سنگھ سے گوجرہ تک کا سفر کیا۔ جہاں طے شدہ مقام پر کال کرنے والی خاتون موجود تھی، جس نے انتہائی ہوشیاری سے یہ کہا کہ رشتے دار خاتون جا سکتی ہیں کیونکہ متاثرہ لڑکی کو وہ انٹرویو کے لیے لے جارہی ہے۔ خاتون پر بھروسہ کرتے ہوئے متاثرہ لڑکی اکیلے اُس کے ساتھ گاڑی میں بیٹھ گئی، جس میں 3 ملزمان پہلے سے ہی موجود تھے۔ جو اُسے گوجرہ موٹر وے لے آئے اور اس دوران 18برس کی لڑکی کے ساتھ ملزمان باری باری زیادتی کرتے رہے۔ گاڑی میں اجتماعتی زیادتی کا نشانہ بنانے کے بعد ملزمان لڑکی کو فیصل آباد انٹر چینج پر پھینک کر فرار ہوگئے تھے تاہم چھاپے مار کر مرکزی ملزم کے ساتھی کو گرفتار کرلیا گیا ہے جبکہ متاثرہ لڑکی کا میڈیکل کرواکر ڈی این اے کے لیے لاہور پہنچادیا گیا ہے۔ دوسری جانب اس واقعے کا آئی جی پنجاب راؤ سردار علی خان نے نوٹس لیا ہے اور ملزمان کی جلد از جلد گرفتاری کی یقین دہانی کرائی ہے۔
نوکری کی پیش کش آئے تو کیا کریں؟
اس واقعے نے دیگر خواتین کو بھی خبردار کردیا ہے۔ اگر اُنہیں کہیں سے نوکری کی پیش کش ملے تو وہ اس صورت حال میں کیا کریں۔ سب سے پہلے اس بات کا جائزہ لیں کہ متعلقہ کمپنی کی ساکھ کیا ہے۔ انٹر نیٹ کے ذریعے اس کے بارے میں معلومات حاصل کریں۔ اگر کہیں دور دراز علاقے میں طلب کیا گیا ہو تو خواتین کے لیے ضروری ہے کہ کسی مرد رشتے دار کے ساتھ وہاں کا رخ کریں۔ اگر کسی سڑک یا ریسٹورنٹ یا ہوٹل میں انٹرویو کے لیے بلایا جائے تو حد درجہ احتیاط برتیں۔موبائل فونز کی لوکیشن کو آن ضرور رکھیں، انٹرویو سے جانے سے قبل ادارے سے متعلق اپنے دوست احباب سے مشورہ ضرور کریں۔
Discussion about this post