پیٹرول 30 روپے مہنگا، نئی قیمت 179 روپے 86 پیسے فی لیٹر

وفاقی وزیر خزانہ مفتاح اسماعیل نے اسلام آباد میں پریس کانفرنس کرتے ہوئے اعلان کیا کہ آج رات 12 بجے کے بعد سے پیٹرول 30 روپے اضافی رقم کے ساتھ 179 روپے 86 پیسے فی لیٹر کا ہوجائے گا۔ ان کا کہنا تھا کہ عوام پر کچھ نہ کچھ بوجھ ڈالنا ناگزیر ہے۔ پی ٹی آئی حکومت کی پالیسز کے باعث مہنگائی کا سامنا کرنا پڑ رہا ہے۔اس حکومت نے پیٹرول اور ڈیزل کی قیمت کو فکس کیا۔ عوام پر کسی بھی قسم کا بوجھ ڈالنا حکومت وقت کے لیے مشکل فیصلہ ہے۔ 15 دن میں 55 ارب روپے کا نقصان برداشت کرچکے ہیں۔ پیٹرول قیمتیں بڑھائے بغیر آئی ایم ایف کا پروگرام نہیں مل سکتا۔

وفاقی وزیر کے مطابق لائٹ ڈیزل اور مٹی کے تیل کی قیمت میں بھی 30 روپے اضافہ کیا جارہا ہے۔ جس کے بعد لائٹ ڈیزل 148 روپے  31 پیسے فی لیٹر کا ہوجائے گا۔ ایک لیٹر ڈیزل 174 روپے 15 پیسے کا ہوجائے گا۔  اسی طرح مٹی کا تیل 155 روپے 56 پیسے فی لیٹر کا ہورہا ہے۔ مفتاح اسماعیل کا مزید کہنا تھا کہ حکومت اس وقت پیڑولیم پر فی لیٹر 56 روپے سبسڈی دے رہی ہے۔