کارٹون کریکٹر منی ماؤس کا روایتی لباس ہوا تبدیل

بچوں اور بڑوں کے من پسند کارٹون کریکٹر منی ماؤس کو اس کے پرستار اب ایک نئے روپ میں دیکھیں گے۔ منی ماؤس اپنے روایتی اور ٹریڈ مارک گیٹ اپ سرخ اور سفید پولکا ڈاٹ ڈریس کے بجائے نیوی بلیو پینٹ سوٹ میں شرارتی کرتی نظر آئے گی۔ والٹ ڈزنی انتظامیہ  کا کہنا ہے کہ یہ نیا سراپا منی مارچ میں ” ویمن ڈے” کے موقع پر زیب تن کرے گی۔ منی ماؤس کا یہ نیا لباس برطانوی ڈیزائنر اسٹیلا مک کارٹنی نے تیار کیا ہے۔ سوشل میڈیا پر منی ماؤس کے اس نئے لباس کو جہاں پسند کیا جارہا ہے، وہیں کچھ صارفین کا خیال ہے کہ یہ عجیب و غریب ہی ہے۔

منی ماؤس دراصل مکی ماؤس کی فیملی کا حصہ ہے۔ جس کے پرستار دنیا بھر میں موجود ہیں۔  جس کی نٹ کھٹ شرارتیں ہر ایک کو کھکھلانے پر مجبور کردیتی ہیں۔ منی ماؤس پر جہاں کارٹون بنے ہیں وہیں فلمیں بھی جبکہ ڈزنی لینڈ کے مختلف تھیم پارکس میں منی ماؤس کا کردار مہمانوں کا استقبال کرنے کے لیے ہر وقت موجود ہوتا ہے۔