ضابطہ اخلاق کی خلاف ورزی کرنے پر بین کٹنگ اور سہیل تنویر پر جرمانہ عائد

قذافی اسٹیڈیم لاہور میں کھیلے گئے ایچ بی ایل پی ایس ایل 7 کے 22ویں میچ میں پی ایس ایل کے ضابطہ اخلاق کے لیول 1 کی خلاف ورزی کرنے پر پشاور زلمی کے بین کٹنگ اور کوئٹہ گلیڈی ایٹرز کے سہیل تنویر پر میچ فیس کا 15 ، 15 فیصد جرمانہ عائد کردیا گیا ہے۔ دونوں کھلاڑی میچ کے دوران  نامناسب اشارہ کرنے پرپی ایس ایل کے ضابطہ اخلاق کی شق 2.6کی خلاف ورزی کے مرتکب پائے گئے ہیں۔ یہ واقعہ پشاور زلمی کی اننگز کے دوران  اس وقت پیش آیا جب بین کٹنگ نے  لگاتار تیسرا چھکا جڑنے کے بعد سہیل تنویر کو انگلی سے  نامناسب اشارہ کیا۔

جواب میں سہیل تنویر نےبھی  اسی اننگ کے آخری اوور کی پہلی گیند پر نسیم شاہ کی گیند پر بین کٹنگ کا کیچ پکڑنے کے بعد یہی اشارہ کیا۔ میچ ریفری علی نقوی کا کہنا ہے کہ اس  قسم کے نامناسب اشاروں کی کھیل میں کوئی جگہ نہیں ہے۔ تمام کھلاڑیوں  کو اپنی آن اور آف دا فیلڈ ذمہ داریوں کو سمجھنے کی ضرورت ہے۔ یہ تمام کھلاڑی نئی نسل کے لیے رول ماڈل ہیں اور ان رویہ سے نوجوان نسل کو غلط پیغام جاتا ہے۔

The over @Cuttsy31 was looking for 👀 #HBLPSL7 l #LevelHai l #PZvQG pic.twitter.com/YZWw1rorOn

— PakistanSuperLeague (@thePSLt20) February 15, 2022

انہوں نے کہا کہ ایچ بی ایل پی ایس ایل 7 کے دوران بہترین میچز جاری ہیں تاہم اس دوران کھلاڑیوں کو اسپرٹ آف کرکٹ کا مکمل خیال رکھنے کی ضرورت ہے۔ دونوں کھلاڑیوں نے اپنی غلطی کا اعتراف کرتے ہوئے میچ ریفری علی نقوی کی جانب سے عائد جرمانے کو قبول کیا ہے۔