نیشنل سیکوریٹی کمیٹی کا اجلاس اور وزیراعظم کا قوم سے خطاب

وفاقی وزیر فواد چوہدری نے اپنے ایک بیان میں بتایا کہ نیشنل سیکیورٹی کا اجلاس آج وزیرا عظم ہاؤس میں ہوگا،جس میں شرکت کے لیے تمام پارلیمانی لیڈران کو دعوت دی گئی ہے۔ فواد چوہدری کا کہنا تھا کہ اجلاس آج دوپہر 2 بجے وزیرا عظم ہاؤس میں ہوگا۔ اس سے قبل وزیر اعظم عمران خان نے سیاسی کور کمیٹی کا اجلاس بھی آج دوپہر 12 بجے وزیر اعظم ہاؤس میں طلب کیا ہوا ہے۔ جس میں وزیر اطلاعات فواد چوہدری اور وزیر داخلہ شیخ رشید سمیت دیگر رہنما اجلاس میں شریک ہیں۔ ذرائع کے مطابق وزیراعظم ہاؤس میں آج طلب کیے گئے سیاسی کمیٹی کے اجلاس میں مزید منحرف ہونے والے اراکین سے متعلق غور کیا جائے گا۔ ذرائع نے بتایا کہ اجلاس میں تحریک عدم اعتماد سے متعلق مشاورت کی جائے گی اور حکومتی حکمت عملی پر غور بھی ہوگا۔

وزیر اعظم عمران خان کا قوم سے خطاب

مختصر سی ٹوئٹ میں فواد چوہدری نے بتایا ہے کہ وزیراعظم عمران خان آج رات قوم سے خطاب کریں گے۔

وزیر اعظم عمران خان آج رات قوم سے خطاب کریں گے

— Ch Fawad Hussain (@fawadchaudhry) March 31, 2022

اس سے قبل گذشتہ روز بھی یہ خبریں سامنے آئیں تھی کہ وزیراعظم قوم سے خطاب کریں گے تاہم وزیراعظم کی مصروفیت کے باعث یہ ممکن نہ ہوسکا۔ توقع کی جارہی ہے کہ وزیراعظم قوم سے خطاب میں موجودہ سیاسی صورت حال اور عالمی سازش سے متعلق قوم کو آگاہ کرینگے، اپنے خطاب میں وہ قوم کو دھمکی آمیز خط کا معاملہ بھی سامنے رکھیں گے۔