سابق محبوب کا خطرناک انتقام، شادی میں دیا گیا تحفہ دھماکے سے پھٹ گیا

بھارتی ریاست گجرات کے گاؤں وانسد میں ایک گھر کی خوشیاں افسوسناک واقعہ میں اس وقت بدل گئی جب ایک روز قبل ہوئی شادی کی تقریب میں دلہا اور دلہن کو دیئے گئے تحفے تحائف کو کھولنے کا موقع آیا۔ گھر میں مہمانوں اور عزیر و اقارب کی بیٹھک جمی تھی اور سبھی تحفے دیکھنے کے لیے پرجوش تھے۔ اس دوران دلہا لتیش اور اس کے بھتیجے نے ایک پیکنگ کو کھولا تو اس میں ایک خوبصورت ٹیڈی بیئر نکلا، دونوں نے اسے چلانے کے لیے جیسے ہی چارجنگ میں لگایا تو وہ اچانک دھماکے سے پھٹ گیا، جس سے لتیش اور بھتیجا دونوں شدید زخمی ہوگئے۔ اہلخانہ نے ہنگامی حالت میں دونوں کو اسپتال پہنچایا جہاں انہیں طبی امداد دی گئی اور دونوں کی حالت خطرے سے باہر بتائی گئی۔

بہرحال یہ جان لیوا تحفہ کس نے دیا اور کون ایسا کرنا چاہتا تھا پولیس نے جب کھوج لگائی تو معلوم ہوا کہ اس ٹیڈی بیئر میں دھماکا خیز مواد نصب کیا گیا تھا اور یہ تحفہ دلہن کی بڑی بہن جگریتی کے دوست راجیش پٹیل نے دیا تھا وہ دراصل جگریتی کو دوستی ختم کرنے کی پاداش میں موت کے گھاٹ اتارنا چاہتا تھا تاہم جگریتی نے اس کا بھیجا گیا تحفہ لتیش کو شادی کے تحفے کے طور پر دے دیا تھا۔

راجیش اور جگریتی کئی سال تک دوست رہے تھے لیکن کچھ ہفتے قبل جگریتی نے اس سے دوستی ختم کردی تھی جس پر راجیش نے اسے قتل کرنے کی نیت سے ٹیڈی بیئر میں دھماکا خیز مواد نصب کرکے اسے تحفے کے طور پر ایک سہیلی کے ذریعے بھجوایا تھا، تاہم جگریتی نے اس کا بھیجا گیا تحفہ اپنے بہنوئی کو شادی کے تحفے کے طور پر دے دیا تھا۔ پولیس کے مطابق راجیش پٹیل اور اس منصوبہ بندی میں شامل اس کے دوست منوج کو گرفتار کر لیا ہے جبکہ راجیش پٹیل کی تلاش کے لیے پولیس کا سرچ آپریشن جاری ہے۔