زمان پارک میں ہنگامہ آرائی پر مقدمہ

تحریک انصاف کے سربراہ اور سابق وزیراعظم عمران خان پر زمان پارک میں ہنگامہ آرائی کا مقدمہ تھانہ ریس کورس میں درج کرلیا گیا ہے۔ یہ مقدمہ ایس ایچ او ریس کورس ریحان انور کی مدعیت میں درج کیا گیا جس میں دہشت گردی سمیت 20 دفعات شامل ہیں۔ موقف یہ ہے کہ تحریک انصاف کے لیڈران اور کارکنوں نے عمران خان کی ایما پر سنگین جرائم کیے اور اسی بنا پر ان کے خلاف مجرمانہ سازش کی دفعہ بھی شامل کی گئی ہے۔ ان میں  بلوہ، مسلح افراد کا غیرقانونی اکٹھا ہونا اور سمن وصولی سے انکار کی دفعات شامل ہیں جب کہ کار سرکار میں مداخلت، مجرموں کو پناہ دینے کی دفعات بھی نمایاں ہیں۔ ایف آئی آر کے مطابق  پی ٹی آئی کارکن  عوام کے لیے مشکلات اور پریشانی پیدا کرنے کا باعث بنے ۔ کارکنوں نے پٹرول بم استعمال کیے اور سرکاری املاک کو نقصان پہنچایا۔ اس کے علاوہ کارکنوں کے حملوں میں ڈی آئی جی اسلام آباد سمیت 63 اہلکار زخمی ہوئے۔