ایبٹ آباد کی مسجد میں کرسمس کی تقریب

ایبٹ آباد کی ایک مسجد میں مسیحی بچوں کے لیے کرسمس کی تقریب کا انعقاد کیا گیا جس میں مدرسے کے  مسلمان طلبہ و طالبات نے مسیحی بچوں کو اسکول بیگ اور کرسمس کے گفٹ پیش کیے ۔  تقریب کا اہتمام مدنی جامع مسجد و مدرسہ ترتیل القرآن کے طلبہ و طالبات نے رحمت للعالمین اتھارٹی کے معاونت سے کیا تھا ۔ مسلم علما اور طلبہ نے مسیحی بچوں اور فادرز کی آمد پر گل پاشی کی اور انہیں ویلکم کیا ۔ تقریب سے خطاب کرتے ہوئے رحمت للعالمین اتھارٹی کے چئیرمین خورشید احمد ندیم نے کہا کہ مسلمانوں اور مسیحیوں کے درمیان بے شمار مشترکات ہیں۔

تقریب سے مسجد کے امام اور معروف عالم دین مولانا سید اکبر علی شاہ ، مسیحی رہ نما ذاکر پال ایڈووکیٹ ، رحمت للعالمین اتھارٹی کے ڈائریکٹر ظفرمحمود ملک، پادری پیٹر گل  ، پادری پال مسیح ، پادری اسلم مسیح ، پادری ناصر ولیم اور تقریب کے منتظم سبوخ سید سمیت دیگر مقررین نے خطاب کیا ۔ مقررین نے کہا کہ مسیحیوں سمیت دیگر مذاہب سے تعلق رکھنے والے افراد نے قیام پاکستان سے لیکر استحکام پاکستان تک بے شمار خدمات اور قربانیاں دی ہیں جنہیں نصاب میں شامل کرنا چاہیے۔

مسیحی رہنماؤں کا کہنا تھا کہ ملک میں پہلی بار کسی مسجد کی حدود میں اس نوعیت کی تقریب ہوئی جس سے انہیں حوصلہ اور خوشی ملی۔ تقریب میں مسلم اور مسیحی بچوں نے قرآن اور انجیل کی تلاوت کی ۔ حمد ، نعت اور  سیدنا عیسی ابن مریم کی آمد پر مقدس گیت پڑھے ۔ بچوں نے مسلم مسیحی تعلقات کے فروغ پر تقاریر کیں ۔ تقریب کے اختتام پر مسلم بچوں نے مسیحی بچوں کو خود کھانا پیش کیا اور انہیں  اسکول بیگ اور کرسمس کے گفٹ پیش کیے۔