نواز شریف سیاست سے کنارہ کش نہیں ہورہے ، مریم نواز

مسلم لیگ نون کی اہم رہنما مریم نواز کے بیان کے مطابق وزارت عظمیٰ کا عہدہ قبول نہ کرنے کا مطلب اگر یہ اخذ کیا جا رہا ہے کہ نواز شریف سیاست سے کنارہ کش ہو رہے ہیں تو اس میں کوئی سچائی نہیں۔ اگلے 5سال وہ نا صرف بھرپور سیاست کریں گے بلکہ وفاق و پنجاب میں اپنی حکومتوں کی سرپرستی کریں گے۔ مریم نواز کا کہنا ہے کہ نوازشریف کی تینوں حکومتوں میں عوام نے واضح اکثریت دی تھی اور یہ بات وہ انتخابی تقاریر میں واضح کر چکے ہیں کہ وہ کسی مخلوط حکومت کا حصہ نہیں بنیں گے۔ جو لوگ نواز شریف کے مزاج سے وقف ہیں انھیں نواز شریف کے اصولی موقف کا علم  ہے۔ شہباز شریف اور مریم نواز  ان کے سپاہی ہیں، ان کے حکم کے پابند ہیں اور ان کی سربراہی اور نگرانی میں کام کریں گے- یاد رہے کہ نون لیگ اور اس کی اتحادی جماعتوں نے نواز شریف کے بجائے شہباز شریف کو اپنا متفقہ وزیراعظم نامزد کیا ہے۔