آرمی چیف کی سعودی ولی عہد محمد بن سلمان سے ملاقات

سعودی شہر ریاض میں آرمی چیف جنرل عاصم منیر اور سعودی ولی عہد شہزادہ محمد بن سلمان سے ملاقات ہوئی۔  انٹر سروسز پبلک ریلیشنز کے مطابق آرمی چیف نے سعودی وزیرِ دفاع خالد بن سلمان، سعودی چیف آف جنرل اسٹاف جنرل فیاض بن حامد الرویلی اور نائب وزیر دفاع انجینئر طلال عبداللّٰہ العطیبی سے ملاقات کی۔ جس میں علاقائی امن و سلامتی، دوطرفہ دفاعی امور اور سیکیورٹی تعاون سمیت دلچسپی کے وسیع تر امور پر تبادلہ خیال کیا گیا۔ شہزادہ محمد بن سلمان نے پاک سعودی تاریخی برادرانہ تعلقات پر روشنی ڈالتے ہوئے کہا کہ سعودی عرب اور پاکستان کے تاریخی برادرانہ اور مضبوط تعلقات ہیں، سعودی عرب اور پاکستان ہمیشہ ایک دوسرے کے ساتھ کھڑے رہے ہیں۔

ولی عہد محمد بن سلمان کا کہنا تھا کہ سعودی عرب مستقبل میں بھی ہمیشہ پاکستان کے ساتھ کھڑا رہے گا۔آئی ایس پی آر کے مطابق آرمی چیف نے پاکستان کے لیے حمایت اور گرم جوشی کے جذبات پر سعودی قیادت کا شکریہ ادا کیا۔