وفاقی وزیر داخلہ کا چینی شہریوں اور منصوبوں کی حفاظت کو یقینی بنانے کا عزم

چینی سفارت خانے آمد پر سفیر جیانگ زی ڈونگ سے ملاقات کے دوران وفاقی  وزیر داخلہ محسن نقوی کا کہنا تھا کہ  سی پیک منصوبوں کی سیکیورٹی کے لیے تمام ممکن اقدامات کو یقینی بنایا جا رہا ہے تاکہ چینی شہریوں کے لیے محفوظ و پر امن ماحول ہو۔ محسن نقوی کہتے ہیں کہ  کراچی واقعے میں ملوث افراد کو انصاف کے کٹہرے میں کھڑا کیا جائے گا، پاکستان اور چین آہنی بھائی اور پائیدار شرکت دار ہیں۔ اس اہم ملاقات میں وزیر داخلہ نے کراچی میں گارڈ کی فائرنگ سے2چینی شہریوں کے زخمی ہونے کے واقعے پر اظہار افسوس کیا۔ محسن نقوی نے واقعے کی تفصیلات اور تحقیقات میں پیش رفت سے چینی سفیر کو آگاہ کیا۔وفاقی وزیر داخلہ اور چینی سفیر کے درمیان ملاقات کے دوران مستقبل میں ایسے واقعات کو روکنے کے لیے مشترکہ حکمت عملی بنانے پر اتفاق کیا گیا۔ چینی سفیر کہتے ہیں کہ  مشترکہ کوششوں سے پاک چین دوستی مسلسل پروان چڑھ رہی ہے اور عملی تعاون میں جامع پیش رفت ہوئی ہے، اس تناظر میں ایک محفوظ اور مستحکم تعاون کا ماحول انتہائی اہم ہے۔ انہوں نے کہا کہ چین دوطرفہ سیکیورٹی تعاون کو مزید آگے بڑھانے اور پاکستانی اداروں کی صلاحیتوں میں اضافے کے لیے تیار ہے۔