انڈیا: کمبھ میلے میں بھگدڑ ، کم سے کم 15 افراد ہلاک

غیرملکی میڈیا رپورٹس کے مطابق بھارتی ریاست اترپردیش کے پریاگ راج میں ہونے والے کمبھ میلے میں موجود ایک ڈاکٹر نے نام ظاہر نہ کرنے کی شرط پر بتایا کہ  ابھی تک کم از کم 15 افراد ہلاک ہو چکے ہیں۔ دیگر زخمی افراد  کا علاج کیا جا رہا ہے۔ 13 جنوری سے چھ ہفتوں پر مشتمل یہ میلہ پریاگ راج میں شروع ہوا تھا جس میں بھارت سمیت دنیا بھر سے 40 کروڑ سے زیادہ عقیدت مند شرکت کر رہے ہیں۔ اس میلے میں  بھگڈر میں کچلنے کے کئی خطرناک واقعات رپورٹ ہو چکے ہیں۔ یہ تازہ ترین واقعہ بھی اسی سلسلے کا حصہ ہے۔ عینی شاہدین کا کہنا ہے کہ بھگدڑ اس وقت شروع ہوئی جب ہجوم کو قابو میں رکھنے والی رکاوٹیں ’ٹوٹ‘ گئیں۔ اچانک ایک ہجوم نے دھکا دینا شروع کر دیا اور بہت سے لوگ کچل گئے۔ یاد رہے کہ  1954 میں ایک ہی دن کمبھ میلے کے دوران 400 سے زیادہ افراد کچل کر یا ڈوب کر مارے جاچکے ہیں جبکہ 2013 میں 36 افراد بھگدڑ مچنے سے ہلاک ہوئے تھے۔