بوم بوم آفریدی نے میدان مار لیا

رنگا رنگ تقریب کے ساتھ ہی مظفر آباد میں کشمیر پرئیمیر لیگ کا آغاز ہوگیا ہے ۔ افتتاحی میچ میں شعیب ملک کی میرپور رائلز کا ٹاکرا شاہد آفریدی کی راولا کوٹ ہاکس سے رہا ۔

ٹاس جیت کر پہلے بوم بوم کی ٹیم کو کھلایا گیا جس نے افتتاحی بلے باز احمد شہزاد کی دھواں دھار 69 رنز اور بسم اللہ خان کے 59 رنز کے سہارے 6 وکٹوں کے نقصان پر 194 رنز کا پہاڑ جیسا اسکور کھڑا کردیا ۔

دیگر نمایاں بلے بازوں میں حسین طلعت نے 19 اور کپتان آفریدی نے 16 رنز کا اضافہ کیا ۔ میرپور رائلز کی جانب سے عماد بٹ نے 3 اور سلمان ارشاد نے 2 کھلاڑیوں کو ڈریسنگ روم کی راہ دکھائی ۔

جواب میں میر پور رائلز فتح کی بس جدوجہد کرتی رہی ۔ جس نے 8 وکٹیں کھو کر مقررہ 20 اوورز میں 151 رنز ہی کیے ۔ شعیب ملک 77 رنز بنا کر نمایاں بلے باز رہے۔ جب کہ آفریدی ، زمان خان اور آصف آفریدی کے حصے میں دو دو کھلاڑی آئے ۔ یوں راولا کوٹ ہاکس نے پہلا میچ 43 رنز سے جیت لیا ۔ کے پی ایل میں آج باغ اسٹلینز اور کوٹلی لائنز مد مقابل ہوں گے۔

Typical shahid Afridi knock #KPL2021 pic.twitter.com/ajUXo0ZPo4

— Fahad Khalid (@FahadKh92677916) August 6, 2021