خالد چشتی کا ایٹرنل گاندھی میوزیم میں پہلے پاکستانی مقرر ہونے کا اعزاز

قائداعظم فاؤنڈیشن یو ایس اے کے پیٹرن ان چیف خالد چشتی نے  ایٹرنل گاندھی میوزیم، ہیوسٹن میں مہمان مقررکے طور پر شرکت کی۔  یہ ایک تاریخی موقع تھا کیونکہ  وہ اس ممتاز میوزیم میں مدعو کیے جانے والے پہلے پاکستانی مہمان مقرر بنے۔یہ تقریب اٹل  کھوتاری، شریک بانی ایٹرنل گاندھی میوزیم، اور ڈاکٹر برکت چرانیا، ٹرسٹی، کی میزبانی میں منعقد ہوئی۔

خالد چشتی نے اپنی تقریر میں قائداعظم محمد علی جناح، گاندھی  اور نیلسن منڈیلا جیسے رہنماؤں کی لازوال میراث پر روشنی ڈالی۔ انہوں نے اس بات پر زور دیا کہ عظمت کا راز شہرت میں نہیں بلکہ اپنے مقصد کے ساتھ غیر متزلزل وابستگی میں ہے۔خالد چشتی نے اس موقع پر اپنی نیک تمناؤں کا اظہار کرتے ہوئے سامعین کو معنی خیز تبدیلی کے لیے کام کرنے کی ترغیب دی۔ انہوں نے کہا کہ حقیقی قیادت کا معیار وہ اثر ہے جو ہم معاشرے پر چھوڑتے ہیں۔ ان کا پیغام تھا کہ ہم اپنی زندگی کو کسی مقصد کے لیے وقف کریں اور خدمت اور عزم کے اصولوں کو اپنائیں، جو کہ قائد اعظم محمد علی جناح اور  مہاتما گاندھی کی جدوجہد کا بنیادی حصہ رہے ہیں۔

قائداعظم فاؤنڈیشن یو ایس اے کے پیٹرن ان چیف کے طور پر خالد چشتی ثقافتی تبادلے، قیادت کی ترقی، اور سماجی بھلائی کے فروغ کے لیے سرگرم ہیں۔ وہ دنیا بھر میں بامقصد قیادت کی حوصلہ افزائی اور ترغیب دیتے رہتے ہیں۔