ملائکہ اروڑا کے قابلِ ضمانت وارنٹ

ممبئی کی مجسٹریٹ عدالت نے اداکارہ ملائکہ اروڑا کے خلاف سیف علی خان 2012 ہوٹل حملہ کیس میں بطور گواہ مسلسل غیر حاضری پر قابلِ ضمانت وارنٹ دوبارہ جاری کیے ہیں۔ عدالت نے پیر کو یہ وارنٹ جاری کیے ہیں جبکہ  رواں ماہ کے اختتام تک قابلِ ضمانت وارنٹ کے حوالے سے رپورٹ بھی طلب کی ہے۔ یاد رہے کہ پیر کو سیف علی خان سمیت تمام ملزمان نے حاضری سے استثنیٰ کی درخواست کی اور غیر حاضر رہے جسے عدالت نے منظور کر لیا تھا۔  ملائکہ اروڑا کو پہلے بھی عدالت میں پیش ہونا تھا مگر وہ غیر حاضر رہیں، جس پر عدالت نے ملائکہ اروڑا کے خلاف 5 ہزار روپے کے قابلِ ضمانت وارنٹ دوبارہ جاری کرنے کی ہدایت کی۔

دلچسپ بات یہ ہے کہ اس سے قبل بھی  قبل 15 مارچ کو اداکارہ کے خلاف قابلِ ضمانت وارنٹ جاری ہو چکے ہیں۔ اداکارہ کی بہن امریتا اروڑا کے ساتھ ساتھ ایک اور دوست فرخ واڈیا کے بھی 5 ہزار روپے کے وارنٹ جاری ہوچکے ہیں۔