عوامی مقامات سے چاکنگ، پلوں کے نیچے قائم دسترخوان ہٹانے کا حکم

میئر کراچی مرتضیٰ وہاب نے کراچی میٹروپولیٹن کارپوریشن (کے ایم سی) کے ہیڈ آفس میں کراچی بیوٹیفکیشن ٹاسک فورس کے اجلاس سے خطاب کیا۔ جس میں کمشنر کراچی حسن نقوی، ڈی آئی جی ٹریفک پیر محمد شاہ، سالڈ ویسٹ مینجمنٹ بورڈ کے منیجنگ ڈائریکٹر، مختلف اضلاع کے ڈپٹی کمشنرز اور مختلف بلدیاتی اداروں کے سربراہان نے شرکت کی۔ اس موقع پر  میئر کراچی نے حکم دیا کہ  مختلف پلوں اور فلائی اوورز کے نیچے خیراتی اداروں کی جانب سے قائم کردہ فوڈ ڈسٹری بیوشن پوائنٹس کو مکمل طور پر بند کیا جائے۔ اُن کا مزید کہنا تھا کہ  اہم سڑکوں کے ساتھ تاریخی عمارتوں کو محفوظ رکھا جائے گا۔

انہوں نے  آئی آئی چندریگر روڈ پر مختلف اداروں کے سائن بورڈز کو ڈیجیٹائز کرنے کی تجویز بھی پیش کی۔ میئر کراچی مرتضیٰ وہاب کہتے ہیں کہ سڑکوں کے کنارے کونوکارپس پودوں اور درختوں کو ہٹا دیا جائے گا، اور ان کی جگہ کراچی کے روایتی درخت لگائے جائیں گے۔

سوسائٹی قبرستان کی بیرونی دیوار کو جمالیاتی طور پر خوشگوار انداز میں تعمیر کیا جائے گا، تاکہ سڑک کی کشش میں اضافہ ہو۔ اسی طرح  شاہراہ فیصل پر شادی ہالز کے لیے پارکنگ کی سہولتوں کو بہتر بنانے اور سڑک کے دونوں اطراف سروس روڈز کو اپ گریڈ کرنے کی ضرورت پر زور دیا گیا۔