ملکہ الزبتھ کو ڈاکٹروں کا آرام کا مشورہ، شمالی آئرلینڈ کا دورہ منسوخ

طبی معالجین کا کہنا ہے کہ ملکہ الزبتھ کو آرام دینے کے اس مشورے میں کسی بھی صورت کورونا وبا سے کوئی تعلق نہیں۔ برطانوی ملکہ کو آج شمالی آئرلینڈ کا دورہ کرنا تھا لیکن اب وہ منسوخ کردیا گیا ہے۔ بکنگھم پیلس کے اعلامیہ کے مطابق ملکہ کی صحت درست ہے لیکن طبی معالجین اس بات پر زور دے رہے ہیں کہ اگر وہ کچھ دنوں کے لیے آرام کرلیں گی تو یہ اُن کی صحت کے لیے اور بہتر ہوگا۔ ملکہ کے دورے کی منسوخی پر شمالی آئرلینڈ کے عوام میں مایوسی کی لہر دوڑ گئی۔ 95برس کی ملکہ کو دورے کی منسوخی کا رنج ہے لیکن انہوں نے آئرلینڈ کی عوام کو اس بات کا یقین دلایا ہے کہ وہ مستقبل میں ان کے پاس ضرور آئیں گی۔بکنگھم پیلس کے مطابق حالیہ دنوں میں ملکہ نے انتہائی مصروف شیڈول میں وقت گزارا ہے۔