ریسنگ ڈرائیور سلمیٰ خان کی گاڑی کی ٹکر، موٹر سائیکل سوار زندگی کی بازی ہار گیا

ریسنگ ڈرائیور سلمیٰ خان نے دو نوجوان موٹر سائیکل سواروں کو کچل دیا۔ منگل کی رات اسلام آباد سیکٹر ایف الیون مرکز کے قریب ان کی گاڑی ایسی بے قابو ہوئی کہ سامنے سے آتے ہوئے موٹر سائیکل اس کی زد میں آگئے۔ پولیس کا کہنا ہے کہ موٹر سائیکل سوار تو موقع پر ہی دم توڑ گیا۔جبکہ اس کے عقب میں بیٹھا نوجوان شدید زخمی حالت میں اسپتال لایا گیا۔ جس کی حالت تشویش ناک بتائی جاتی ہے۔ پولیس نے مقتول کے والد کی مدعیت میں مقدمہ درج کرکے موقع سے غائب ہونے والی سلمیٰ خا ن کی تلاش شروع کردی ہے پولیس کا دعویٰ ہے کہ جس وقت یہ حادثہ پیش آیا گاڑی خود سلمیٰ خان ہی چلا رہی تھیں۔ سلمیٰ خان مقبول ریسنگ ڈرائیور ہیں۔ پاکستان میں ہونے والی مختلف کار ریلیز میں شرکت کرتی ہیں۔اور انتہائی برق رفتاری اور مہارت سے گاڑی یا جیپ چلانے کی وجہ سے ذرائع ابلاغ کی زینت بنتی رہتی ہیں۔