پاکستانی نوجوان کے پیار میں کراچی پہنچنے والی خاتون کا امریکا واپسی سے انکار

19 سالہ پاکستانی نوجوان کی محبت میں کراچی پہنچنے والی 33 سالہ خاتون اونیجا اینڈریو رابنس نے وطن واپسی سے انکار کردیا، خاتون نے کراچی ایئرپورٹ پر ہنگامہ آرائی کی اور جہاز میں سوار ہونے سے صاف انکار کردیا۔ خاتون نے پہلے امیگریشن کرانے سے انکار کیا اور پھر ڈیپارچر لاونج میں جہاز میں سوار نہیں ہوئی اور بہانے کرکے کراچی ائیرپورٹ پر امریکا واپسی سے انکار کرتی رہی۔ خاتون کو زبردستی جہاز میں سوار کرانے کی جدوجہد کے باعث پرواز 36 منٹ تاخیر کا شکار ہوئی، سیکورٹی ایس او پیز کی وجہ سے مسافر کو زبردستی پرواز میں سوار نہیں کرایا جاسکتا۔

یاد رہے کہ  2 بچوں کی امریکی ماں 33 سالہ اونیجا اینڈریو رابنس کو گارڈن کراچی کے 19 سالہ ندال میمن سے پیار  ہوگیا تھا ، سوشل میڈیا پر محبت میں مبتلا خاتون 11 اکتوبر کو کراچی پہنچی تھی، 19 سالہ ندال میمن راضی تھا تاہم اس کے گھر والوں نے امریکی خاتون سے بیٹے کی شادی کرانے سے انکار کر دیا۔ مہمان امریکی خاتون کئی ماہ کراچی میں دربدر رہی، اس کے ویزے کی معیاد ختم ہوگئی تھی اور واپسی کا ٹکٹ بھی نہیں تھا۔ کراچی کی ایک این جی او نے خاتون کی امریکا واپسی کا بندوبست کیا، اسے ٹکٹ مہیا کیا اور مالی مدد بھی کی تھی۔امریکی خاتون کو سردی اور فلو کی وجہ سے ایئرپورٹ کے ایمرجنسی کلینک میں بھی داخل کیا گیا تھا۔