صدر آصف زرداری کی دبئی منتقلی کی خبریں درست نہیں، شرجیل میمن

سندھ کے سینیئر وزیر شرجیل انعام میمن کا کہنا ہے کہ صدر مملکت آصف علی زرداری کی طبیعت میں بہتری آرہی ہے۔ منگل کو  صدر مملکت نوابشاہ میں تھے کہ ان کی طبیعت ناساز ہوگئی جس کے بعد ان کو کراچی میں کلفٹن کے نجی اسپتال میں منتقل کردیا گیا تھا جہاں ان کا علاج جاری ہے۔ سینیئر وزیر نے اپنے بیان میں بتایا ہے کہ صدر آصف علی زرداری جلد مکمل صحتیاب ہو جائیں گے۔ صدر مملکت کو علاج کی غرض سے دبئی منتقل کرنے کی اطلاعات درست نہیں ہیں۔

اسپتال میں صدر آصف زرداری ان کے میڈیکل ٹیسٹ کیے گئے۔ ان کو انفیکشن اور بخار کی وجہ سے اسپتال میں داخل کیا گیا۔ دوسری جانب  وزیراعظم شہباز شریف نے بھی صدر مملکت آصف زرداری سے رابطہ کیا اور ان کی خیریت دریافت کی۔ وزیراعظم کا کہنا تھا کہ پوری قوم کی دعائیں آپ کے ساتھ ہیں۔ انہوں نے دعا کی کہ اللہ صدر مملکت کو جلد صحت کاملہ عطا فرمائے۔