بابر اعظم پر ہراسانی کا الزام لگانے والی خاتون عدالت میں پیش

لاہور ہائیکورٹ کے جسٹس وحید خان نے قومی کرکٹر بابراعظم کی درخواست پر سماعت کی، عدالتی حکم پر ہراسانی کا الزام عائد کرنے والی خاتون اپنی وکیل کے ساتھ پیش ہوئیں۔ یاد رہے کہ  عدالت نے بابراعظم کے خلاف اندراج مقدمہ کے فیصلے کے خلاف حکم امتناع جاری کررکھا ہے۔ عدالت نے بابراعظم کے وکیل سے استفسار کیا کہ یہ 2021 کی درخواست ہے، ہر مرتبہ آپ کیس ملتوی کرنے کی درخواست دائر کرتے ہیں اس پر بابر کے وکیل کے ایسوسی ایٹ نے بتایا کہ سینئر وکیل بیرسٹر حارث عظمت  نہیں لہٰذا کیس ملتوی کیا جائے۔ اس موقع پر خاتون درخواست گزار کے وکیل نے عدالت میں مؤقف اختیار کیا کہ یہ زنا کا کیس ہے، کرکٹر بابراعظم شادی کا جھانسا دے کر اس سے زیادتی کرتا رہا ہےاور بابراعظم نے خاتون کے 12 لاکھ بھی دینے ہیں۔ عدالت نے  بابراعظم کے وکیل کی استدعا منظور کرتے ہوئے کیس کی سماعت 16 دسمبر تک ملتوی کردی۔