احتساب عدالت کے جج محمد بشیر ریٹائر ہوگئے

جج محمد بشیر 13 مارچ 2012 کو احتساب عدالت میں تعینات ہوئے تھے، انہوں نے نواز شریف، مریم نواز اور کیپٹن ریٹائرڈ صفدر کو سزائیں سنائیں۔ جج محمد بشیر نے بانی پی ٹی آئی اور بشریٰ بی بی کو توشہ خانہ کیس میں سزا سنائی۔ اس اعتبار سے وہ 2  سابق وزرائے اعظم کو سزا دے چکے ہیں۔ جج محمد بشیر نے 2018 میں ایون فیلڈ پراپرٹیز کیس میں نواز شریف کو 10 سال قید بامشقت، مریم نواز کو 7 سال قید بامشقت اور کیپٹن (ر) صفدر کو ایک سال قید بامشقت کی سزا سنائی تھی جبکہ حسن اور حسین نواز کو اشتہاری ملزم قرار دیا گیا تھا۔ جج محمد بشیر لگ بھگ 12 سال اپنے عہدے پر قائم رہے۔ ان کے پاس صدر مملکت آصف زرداری کے خلاف کیسز بھی زیر سماعت رہے۔ جج محمد بشیر نے شاہد خاقان عباسی، راجہ پرویز اشرف اور یوسف گیلانی کے کیسز بھی سنے، انہوں نے توشہ خانہ کیس کا فیصلہ سنانے کے بعد میڈیکل رخصت لے لی تھی۔