توشہ خانہ 2؛ بانی پی ٹی آئی کو بطور وزیراعظم ملنے والے تحائف کی فہرست عدالت میں پیش

اسپیشل جج سینٹرل شاہ رخ ارجمند کے روبرو ہونے والی سماعت میں بانی پی ٹی آئی اور بشریٰ بی بی  موجود تھے  جب کہ بیرسٹر گوہر، سلمان اکرم راجا اور فیصل چوہدری بھی سماعت کے موقع پر عدالت میں پیش ہوئے۔ اس دوران  کیبنٹ ڈویژن کے سیکشن آفیسر کا بیان ریکارڈ کرلیا گیا۔ بشریٰ بی بی کے وکیل ارشد تبریز نے گواہ پر جزوی جرح کی، جو آئندہ سماعت پر مکمل کی جائے گی۔ا سی طرح اگلی سماعت پر بانی پی ٹی آئی کے وکیل سلمان صفدر بھی گواہ پر جرح کریں گے۔ اس موقع پر  گواہ نے 100 صفحات پر مشتمل ریکارڈ عدالت میں پیش کردیا۔ گواہ کی جانب سے توشہ خانہ 2 کیس کے سلسلے میں بانی پی ٹی آئی کو بطور وزیر اعظم ملنے والے 108تحائف کی فہرست عدالت پیش کر دی  گئی۔ علاوہ ازیں گواہ نے توشہ خانہ تحائف کے ریکارڈ سے متعلق 2رجسٹر بھی عدالت پیش کردیے۔عدالت نے  توشہ خانہ 2 کیس کی سماعت 2 جنوری تک ملتوی کردی۔