ڈی چوک احتجاج: صحافیوں اور وی لاگرز کیخلاف ریاست مخالف جھوٹا بیانہ بنانے کے مقدمات

فیڈرل انویسٹی گیشن ایجنسی (ایف آئی اے) اسلام آباد کے سائبرکرائم ونگ نے تحریک انصاف کے 24 نومبر کے احتجاج کی کوریج کرنے والے درجنوں صحافیوں اور وی لاگرز کے خلاف مقدمات درج کرلیے۔ پیکا ایکٹ کے تحت درج کیے گئے مقدمات میں نامزد ملزمان پر ریاستی اداروں کے خلاف جھوٹا بیانیہ بنا کر پھیلانے اور عوام  کو اکسانے کے الزامات لگائے گئے ہیں۔ ایف آئی اے سائبر کرائم ونگ کی جانب سے درج کیے گئے مقدمات میں صحافی ہرمیت سنگھ، احمد نورانی، عبدالقادر، حسنین رفیق، سلمان درانی، عمران کھٹانہ، مریم شفقت ملک اور رضوان احمد خان کو نامزد کیا گیا ہے۔ ہرمیت سنگھ نے اپنے ٹوئٹر پروفائل کے ذریعے پاکستان کے ریاستی اداروں کے خلاف بدنیتی پر مبنی بیانیے کو فروغ دیا جس میں 24 سے27 نومبر 2024 کے واقعات بھی شامل ہیں۔ اُن کا یہ عمل عوام کو پُرتشدد کارروائیوں کی طرف مائل کرنے، شہریوں میں خوف و ہراس اور عدم تحفظ کا احساس پیدا کرنے اور ریاست کے ستونوں کے درمیان عداوت پیدا کرنے کی گھناؤنی کوشش کی۔مقدمے کے مطابق ہرمیت سنگھ نے مخصوص لوگوں کے سیاسی مفادات کے لیے صوبائیت اور نسلی انتشار کو ہوا دی، جو کہ بغاوت کی مذموم حرکت ہے۔ دوسری جانب ایف آئی اے سائبر کرائم راولپنڈی نے چھاپہ مار کارروائی کے دوران ریاستی اداروں کے خلاف پروپیگنڈے میں ملوث ملزم الیاس اعوان کو گرفتار کرلیا۔ ملزم افواج پاکستان کے خلاف پراپیگنڈے اور ریاستی اداروں کے خلاف سوشل میڈیا پر ڈس انفارمیشن پھیلانے میں ملوث تھا۔ چھاپہ مار کارروائی میں ملزم کے قبضے سے موبائل فون اور دیگر شواہد برآمد کر لیے گئے، گرفتار ملزم سے تفتیش کا آغاز کر دیا گیا ہے جبکہ ملزم کے دیگر ساتھیوں کے خلاف چھاپہ مار کاروائیاں جاری ہیں۔