عید کب ہوگی؟ مصری اور اماراتی ماہرین کے امکانات

عرب میڈیا کے مطابق مصر کے نیشنل انسٹی ٹیوٹ فار آسٹرونومیکل اینڈ جیو فزیکل ریسرچ نے امکان ظاہر کیا ہے کہ رمضان المبارک 29 دن کے ہوں گے اور آخری روزہ 29 مارچ  یعنی ہفتہ کو ہوگا، اسی تناسب سے عید 30 مارچ یعنی اتوار کو ہوسکتی ہے، مصری ماہرین کے مطابق دنیا کے تقریباً 30 شہروں میں 29 مارچ کو شوال کا چاند نظر آنے کا امکان ہے، جن میں مکہ مکرمہ، مدینہ منورہ، ریاض، انقرہ، تہران، مسقط، کراچی، لندن، ماسکو اور اوٹاوہ شامل ہیں۔ اُدھر اماراتی آسٹرونومی سوسائٹی کے چیئرمین ابراہیم الجروان نے بھی امکان ظاہر کیا ہے کہ  عید 30 مارچ یعنی اتوار  یا 31 مارچ  پیر کو ہوسکتی ہے۔ ان کا دعویٰ ہے کہ  29 مارچ کو دوپہر 2:58 بجے (مقامی وقت) پر شوال کا چاند جنم لے گا، لیکن چونکہ سورج غروب ہونے تک چاند کی عمر صرف 3 گھنٹے ہوگی، اس لیے چاند دیکھنا دشوار ہوسکتا ہے۔ اگر ایسا ہوا تو عید 31 مارچ  یعنی پیرکو ہوسکتی ہے۔