کراچی میں وزیرِاعلیٰ سندھ مراد علی شاہ کی زیرِ صدارت اجلاس میں شہر میں بارشوں کی وجہ سے متاثرہ سڑکوں کی مرمت سے متعلق جائزہ لیا گیا۔ اجلاس میں صوبائی وزیرِ منصوبہ بندی و ترقی ناصر شاہ، وزیرِ بلدیات سعید غنی، میئر کراچی مرتضیٰ وہاب، چیف سیکریٹری، چیئرمین پی اینڈ ڈی و دیگر شریک ہوئے۔ ترجمان وزیرِاعلیٰ سندھ کا کہنا ہے کہ کراچی ڈویژن کے 7 اضلاع میں سڑکوں کے پیچ ورک کی ضرورت ہے، متاثرہ سڑکوں کی مرمت کے لیے ڈیڑھ ارب روپے کی منظوری دی گئی ہے۔
اس موقع پر مراد علی شاہ کا کہنا تھا کہ تعمیر یا مرمت کی گئی سڑکیں وقت سے پہلےخراب ہوئی ہیں تو انکوائری کریں، معلوم کیا جائے کہ سڑک کس نے بنائی اور کیوں خراب ہوئی۔ جس نے بھی سڑکوں کا ناقص کام کیا اس کے خلاف سخت کارروائی کریں۔ اس موقع پر وزیرِاعلیٰ سندھ نے کے ایم سی کو ہدایت دی کہ جو سڑکیں تعمیر کریں اس کا نکاسی آب کا نظام بھی بنائیں اور ہر سڑک کی سروس لائن بھی ضرور بنائی جائے۔
Discussion about this post