لڑکی کو ہراساں کرنے کا واقعہ، مشتبہ شخص گرفتار

ایس ایس پی ایسٹ زبیر شیخ کا کہنا ہے کہ انہوں نے ایک مشتبہ نوجوان کو گرفتار کیا ہے جو گلستان جوہر میں لڑکی کو ہراساں کرنے والے ملزم سے مشابہت رکھتا ہے۔ پولیس کے مطابق متعلقہ نوجوان اور سی سی ٹی وی ویڈیو والا فرد دونوں ملتے جلتے ہیں۔ پولیس نے ایک موٹر سائیکل کو بھی تحویل میں لیا ہے جبکہ واقعے سے متعلق مزید تفتیش جاری ہے۔ یاد رہے کہ گلستان جوہر مغل ہزارہ گوٹھ کے قریب باحجاب  راہ گیر لڑکی سے ایک ملزم نے مبینہ زیادتی کی کوشش کی تھی۔ واقعے کی ویڈیو وائرل ہوئی۔  لڑکی کی  ملزم کے ساتھ مزاحمت کے بعد وہ موٹر سائیکل پر بیٹھ کر فرار ہوجاتا ہے۔ ملزم نے شناخت چھپانے کے لیے ماسک بھی پہنا ہوا تھا۔ چند دن پہلے ملزم کا خاکہ سی سی ٹی وی فوٹیج اور عینی شاہدین کی مدد سے  پولیس نے تیار کرایا تھا۔