خیبر پخونخوا : پولیو ڈیوٹی کیلیے جانے والا پولیس اہلکار فائرنگ سے شہید

پولیس کے مطابق فائرنگ کا واقعہ جمرود کے علاقے میں پیش آیا، جہاں سخی پل کے علاقے میں نامعلوم افراد نے پولیو ڈیوٹی کے لیے جانے والے پولیس اہلکار عبدالخالق پر گولیاں برسائیں جس کے نتیجے میں اہلکار شہید ہوگیا۔ فائرنگ سے انسدادِ پولیو ٹیم کا عملہ محفوظ رہا ہے۔ موٹر سائیکل سوار حملہ آور فائرنگ کے بعد فرار ہو گئے، جائے وقوعہ سے 30 بور کے 2 خول ملے ہیں۔ یاد رہے کہ ملک بھر میں انسدادِ پولیو مہم جاری ہے۔ وفاقی وزیرداخلہ محسن نقوی نے جمرود میں فائرنگ کے واقعے کی مذمت اور جاں بحق ہونےو الے پولیس کانسٹیبل عبدالخالق کو خراج عقیدت پیش کیا ہے۔

خیبر پختونخوا میں رواں سال کی پہلی انسداد پولیو مہم باضابطہ شروع کردی گئی ہے، مہم کے دوران صوبے میں مجموعی طور پر 5سال سے کم عمر کے 65 لاکھ 37ہزار سے زائد بچوں کو پولیو سے بچاؤ کے قطرے پلائے جائیں گے۔انسداد پولیو مہم میں تربیت یافتہ پولیو ورکرز کی 39،842ٹیمیں حصہ لے رہی ہیں، جن میں 32,482 موبائل ٹیمیں، 3،934 نگراں، 1,945 فکسڈ ، 1,321 ٹرانزٹ اور 160 رومنگ ٹیمیں شامل ہیں۔ علاوہ ازیں ٹیموں کی موثر نگرانی کے لیے 8,329 ایریا انچارجز بھی تعینات کیے گئے ہیں۔مہم کے دوران پولیو ٹیموں کی فول پروف سکیورٹی کو یقینی بنانے کے لیے صوبے میں تقریباً 50 ہزار کے قریب اہلکار تعینات کیے گئے ہیں ۔