سدھو موسے والا کا قاتل ہلاک نہیں ہوا، امریکی پولیس

امریکی پولیس نے بھارتی پنجابی گلوکار سدھو موسے والا کے قاتل اور گینگسٹر گولڈی برار کے امریکا میں قتل ہونے کی خبروں سے متعلق بیان جاری کیا ہے۔ یاد رہے کہ بھارتی ذرائع ابلاغ میں یہ خبر عام تھی کہ امریکی شہر کیلی فورنیا میں 2 افراد کے درمیان تصادم ہوا جس کے نتیجے میں ایک شخص گولی لگنے سے ہلاک ہوگیا۔ دعویٰ یہی کیا گیا کہ ہلاک شخص دراصل گلوکار سدھو موسے والا کا قاتل گینگسٹر گولڈی برار تھا جوکہ گزشتہ کئی برسوں سے بیرون ملک مقیم تھا۔ امریکی پولیس نے اس دعویٰ کو جھوٹا قرار دیا ہے۔ جس کا کہنا ہے کہ تحقیق کررہے ہیں لیکن ہلاک ہونے والا شخص گولڈی برار نہیں بلکہ 37 سالہ زیویئر گولڈنی ہے۔ یاد رہے کہ  مئی 2022 میں نامعلوم حملہ آوروں نے سدھو موسے والا کی گاڑی پر فائرنگ کرکے اُنہیں مار ڈالا تھا ۔ بھارت کو انتہائی مطلوب گینگسٹر لارنس بشنوئی اور گولڈی برار نے اعتراف کیا تھا کہ سدھو موسے والا کا قتل اُن کے گینگ نے کیا ہے۔