آزاد اراکین قومی اسمبلی کی سنی اتحاد کونسل میں شمولیت تسلیم

الیکشن کمیشن نے تحریک انصاف کے آزاد اراکین قومی اسمبلی کی سنی اتحاد کونسل میں شمولیت کو تسلیم کرلیاہے۔ اس سلسلے میں قومی اسمبلی سیکرٹریٹ کو باضابطہ پارٹی پوزیشن سےباخبر کردیا گیا ہے۔ جس کے مطابق سنی اتحاد کونسل میں 82 آزاد ارکان قومی اسمبلی شامل ہوئے، جس میں پنجاب کے 49 اور خیرپختونخوا کے 33 ارکان شامل ہیں۔ سنی اتحاد کونسل کو کوئی مخصوص نشست نہیں ملی ۔ قومی اسمبلی میں سنی اتحاد کونسل دوسری بڑی جماعت ہے۔ نون لیگ کے 120، پیپلزپارٹی کے 71 ، متحدہ قومی موومنٹ پاکستان کے 21، جمعیت علمائے اسلام (ف) کے 11 اور مسلم لیگ (ق) کے 5ارکین ہیں۔ الیکشن کمیشن کا کہنا ہے کہ استحکام پاکستان پارٹی کے 4 ارکان ہیں۔ یاد رہے کہ 22 دسمبر کو الیکشن کمیشن نے تحریک انصاف کے انٹرا پارٹی الیکشن کو کالعدم قرار دے کر اس کے انتخابی نشان واپس لے لیا تھا۔ جس کے بعد پی ٹی آئی ’بلے‘ کے انتخابی نشان سے محروم ہوگئی تھی۔