پاکستانی ہیریٹیج منتھ کو سالانہ روایت بنانے کا اعلان

پاکستانی ہیریٹیج منتھ کی دوسری سالگرہ نیو یارک سٹی میں بڑے جوش و خروش کے ساتھ منائی گئی۔ یہ نہ صرف نیو یارک سٹی بلکہ پورے امریکہ کے لیے ایک یادگار موقع تھا، جس کا مقصد پاکستانی ثقافت اور ورثے کو منانا اور اسے زیادہ سے زیادہ افراد تک پہنچانا تھا۔ اس کی بنیاد پاکستانی امریکن لا اینفورسمنٹ سوسائٹی (پی اے ایل ایس) نے رکھی تھی، جو اس اہم سنگ میل کو حاصل کرنے کے لیے مسلسل محنت کر رہی ہے۔  اس موقع پر پاکستانی ثقافت کے جشن میں اہم رہنماؤں نے شرکت کی، جن میں پاکستان کے اقوام متحدہ میں مستقل نمائندہ سفیر عاصم افتخار احمد، عامر احمد آتوزئی، قونصل جنرل نیو یارک، اور ایرک ایڈمز، نیو یارک سٹی کے میئر شامل ہیں۔ ان کی موجودگی نے اس موقع کی اہمیت کو اجاگر کیا اور اس بات کو واضح کیا کہ پاکستانی کمیونٹی کی ثقافتی ورثہ کی قدر کی جاتی ہے۔

پی اے ایل ایس نے اعلان کیا کہ اب پاکستانی ہیریٹیج منتھ ایک سالانہ روایت بن چکا ہے، جو ہر سال منایا جائے گا۔ میئر ایرک ایڈمز کے شکر گزار ہیں جنہوں نے اس جشن کی بھرپور حمایت کی اور پاکستانی کمیونٹی کے ملک اور شہر کی ترقی میں کردار کو تسلیم کیا۔ پی اے ایل ایس کے مطابق  یہ جشن نہ صرف ہماری ثقافتی تنوع اور اتحاد کو منانے کا موقع تھا بلکہ اس نے ہمیں یاد دلا دیا کہ ہم سب مل کر ایک ایسا معاشرہ بنا سکتے ہیں جہاں تمام ثقافتوں کی قدر کی جائے اور ایک دوسرے کے درمیان احترام و محبت کا رشتہ قائم ہو۔