5 جون سے پنجاب میں پلاسٹک تھیلوں پر پابندی

لاہور میں پنجاب کی سینئر وزیر مریم اورنگزیب کی زیر صدارت اجلاس ہوا جس میں اُن کا کہنا تھا کہ پلاسٹک تھیلوں پر پابندی کیلئے وزیراعلیٰ پنجاب مریم نواز  نے منظوری دے دی ہے۔ 22 اپریل کو ارتھ ڈے منایا جائے گا اور ’’پلاسٹک کو ناں‘‘ مہم کا آغاز بھی  ہوگا۔  انہوں نے اس عزم کا اظہار کیا کہ پلاسٹک بیگز کی تیاری، ترسیل اور استعمال پر مکمل پابندی یقینی بنائیں گے۔ مریم اورنگزیب نے عوام کو مشورہ دیا کہ وہ  خود کو کینسر سے بچانے کے لیے پلاسٹک بیگ استعمال نہ کریں۔ عوام سے اب  کپڑے اور کاغذ کے تھیلے استعمال کرنے کی اپیل کی جارہی ہے۔

سینئر وزیر مریم اورنگزیب کا کہنا تھا کہ  دکاندار سمیت تمام لوگ پلاسٹک بیگ استعمال نہ کرنے کی مہم میں ساتھ دیں، گھروں میں پلاسٹک کی اشیا اور برتن استعمال نہ کریں۔ ان کا مزید کہنا تھا کہ ماحول کو بہتر بنانا ہم سب کی زندگی اور موت کا معاملہ ہے۔  اجلاس میں فیصلہ کیا گیا کہ متعلقہ حکام پلاسٹک بیگز کے استعمال پر پابندی یقینی بنائیں گے، طالب علموں اور تعلیمی اداروں میں خصوصی لیکچرز اور تربیتی ورکشاپس ہوں گی۔