شکیب الحسن نے ٹیسٹ اور ٹی ٹوئنٹی کو الوداع کہہ دیا

بھارت کے خلاف دوسرے ٹیسٹ میچ سے قبل کان پور میں پریس کانفرنس کرتے ہوئے شکیب الحسن نے انٹرنیشنل کرکٹ کے دونوں فارمیٹ سے ریٹائرمنٹ لینے کا اعلان کردیا۔ ان کا کہنا ہے کہ اگر کرکٹ بورڈ بنگلا دیش میں الوداعی ٹیسٹ میچ کھیلنے کی اجازت نہیں دیتا تو بھارت کے خلاف ٹیسٹ میچ کیریئر کا آخری ٹیسٹ میچ ہو گا۔ بنگلہ دیشی آل راؤنڈر کے مطابق انہوں میرپور میں اپنا آخری ٹیسٹ میچ کھیلنے کی خواہش کا اظہار بنگلا دیش کرکٹ بورڈ سے کیا ہے۔ کرکٹ بورڈ ہر چیز کو ترتیب دینے کی کوشش کر رہا ہے تاکہ شکیب الحسن  بنگلا دیش جا سکیں، اگر ایسا نہیں ہوا تو کانپور میں بھارت کے خلاف میچ ٹیسٹ کرکٹ ان کا آخری میچ ہوگا۔

سابق وزیرِاعظم حسینہ واجد کے خلاف ہونے والے مظاہروں کے دوران بنگلا دیش میں شکیب الحسن کو قتل کے ایک مقدمے میں نامزد کیا گیا ہے۔ جنوبی افریقا نے 2 ٹیسٹ میچز کی سیریز کے لیے اکتوبر میں بنگلادیش کا دورہ کرنا ہے، دونوں ٹیموں کے درمیان پہلا ٹیسٹ 21 اور دوسرا ٹیسٹ 29 اکتوبر سے شیڈول ہے۔شکیب الحسن نے 70 ٹیسٹ میچز میں 4600 رنز بنائے ہیں اور 242 وکٹیں حاصل کی ہیں۔