کراچی میں نوجوان مصطفیٰ عامر کے اغوا کے بعد قتل کے معاملے پر پولیس نے ملزم ارمغان کے ریمانڈ کیلئے سندھ ہائیکورٹ سے رجوع کرلیا۔ پولیس نے چھاپہ مارنے والی ٹیم کیخلاف ایف آئی آر کے آرڈر کو بھی چیلنج کردیا۔ سندھ ہائیکورٹ نے دونوں درخواستیں سماعت کیلئے منظور کرلیں۔ یاد رہے کہ کراچی میں مصطفیٰ عامر کو اغوا کے بعد قتل کردیا گیا، مقتول کی لاش حب کے قریب سے ملی۔ درخواستوں میں مؤقف اختیار کیا گیا کہ انسداد دہشت گردی کورٹس کے منتظم جج نے ملزم کو جیل بھیج دیا تھا۔ پراسیکیوٹر جنرل سندھ منتظر مہدی نے کہا کہ یہ ایک انتہائی سنگین نوعیت کا مقدمہ ہے، تفتیش شروع ہونے سے پہلے ملزم کو جیل بھیجنا انصاف کیخلاف ہے، ملزم کے جسمانی ریمانڈ کی اجازت دی جائے۔ پولیس پارٹی کیخلاف مقدمے کا حکم سمجھ سے بالا تر ہے، انسداد دہشت گردی کورٹس کے منتظم جج کا فیصلہ کالعدم قرار دیا جائے۔ سندھ ہائیکورٹ نے دونوں درخواستیں سماعت کیلئے منظور کرتے ہوئے سماعت مقرر کردی، درخواستوں کی سماعت 17 فروری کو ہائیکورٹ کا دو رکنی بینچ کرے گا۔
Discussion about this post