اب شادی کرو اور لاکھوں روپے کماؤ

اگر آپ روم کے تاریخی اور خوبصورت شہر کے کسی محل یا ساحل سمندر پر بیاہ رچانا چاہتے ہیں لیکن جیب آپ کو اس کی اجازت نہیں دیتی تو اٹلی کے خطے لازیو کے حکام نے یہ مشکل حل کردی ہے۔ لازیو میں شادی کرنے والے جوڑوں کو 2 ہزار یورو جو کہ پاکستانی رقم کےمطابق 3 لاکھ سے زائد بنتے ہیں دیئے جائیں گے۔ جو جوڑوں کو شادی ہالز، عروسی ملبوسات، کھانا، فوٹوگرافر، کار اور دیگر اخراجات کے عوض 2 ہزار یورو ملیں گے۔

لازیو حکام کے مطابق اس مہم کو ‘ان لازیو ود لو’ کا نام دیا گیا ہے، جس کا مقصد عالمی وباء سے متاثر ویڈینگ سیکٹر کو بحال کرنا ہے، یہ دلچسپ پیشکش یکم جنوری سے 31 دسمبر 2022 تک ان جوڑوں کو دی جائیں گی جو لازیو میں شادی کے بندھن میں بندھنا چاہتے ہیں، اس پیشکش سے اٹلی کے شہریوں کے ساتھ ساتھ غیر ملکی سیاح بھی فائدہ اٹھا سکتے ہیں۔ جوڑے اپنی درخواستیں اور رسیدیں فراہم کر سکتے ہیں جس پر انہیں شادی پر خرچ کی گئی رقم مل جائے گی۔

روم جدید اٹلی کا مرکز ہے، جس کی ہر جگہ تاریخ سے بھری ہوئی ہے، اس میں قدیم گرجا گھر، خوبصورت چشمے، عجائب گھر اور عالیشان محلات ہیں۔ جہاں دنیا کی کئی نامور شخصیات نے شادی کیں۔ جن میں ہالی ووڈ اداکار ٹام کروز اور کیٹی ہومز جبکہ بالی ووڈ جوڑی دیپکا رنویر اور انوشکا ویرات نے بھی شادی کی تھی۔