بھارتی شخص نے سکوں سے اسکوٹر خریدلیا

بھارتی ریاست آسام سے تعلق رکھنے والے ایک شخص نے اس وقت سب کو حیران کردیا جب وہ سکوں سے بھرا تھلا لے کر ایک شوروم جا پہنچا، شخص کی خواہش تھی کہ وہ موٹرسائیکل خریدے جس کے لیے اس نے آٹھ ماہ تک لگاتار سکے جمع کیے اور اس طرح اپنی خواہش کو پورا کرتے ہوئے موٹر سائیکل کا مالک بن گیا۔

میڈیا رپورٹس کے مطابق سکوں سے بھری بوری کو شوروم تک پہنچانے کے لیے تین افراد کی مدد لی گئی جہاں شوروم میں موجود عملے اور مالک نے مل کر سکوں کی گنتی کی، جس کے بعد سکوں کو حساب لگا کر الگ الگ ٹوکریوں میں رکھا گیا۔ اس پورے مراحل میں انہیں تین گھنٹے سے زائد کا وقت لگا۔

اس انوکھی خریداری نے جلد ہی سوشل میڈیا پر صارفین کی توجہ حاصل کرلی ہے جہاں شخص کی کاوشوں کو سراہا جارہا ہے۔ بھارتی شخص کی اس دلچسپ لین دین نے قطرہ قطرہ کرکے سمندر بننے والی مثال کو سچ کردکھایا ہے۔