مس ورلڈ 2021 کا ٹائٹل رہا مس پولینڈ کے نام

سترہویں مقابلہ حسن کا انعقاد پورٹوریکو میں ہوا جہاں 98 ممالک کی دوشیزاؤں نے اپنی قاتل اداؤں سے ججز کے دل گھائل کیے لیکن حسیناؤں کے اس دنگل میں پولینڈ کی حسینہ کیرولینا بائلاوسکا کی خوبصورت اور ذہانت سب پر بھاری رہی اور یوں وہ مس ورلڈ 2021 کا ٹائٹل جیتنے میں کامیاب ہوگئیں۔

ان کے مدمقابل امریکہ، انڈونیشیا، میکسیکو، آئرلینڈ اور کوٹ ڈیوائر کی دوشیزائیں تھیں جن کو کیرولینا نے کم مارجن سے مات دے کر مس ورلڈ کا تاج اپنے سر پر پہن لیا جبکہ امریکہ کے شری سینی اور کوٹ ڈیوائر کی اولیویا یاسی بالترتیب پہلے اور دوسرے رنر اپ کے طور پر سامنے آئیں۔

کیرولینا کو یہ اعزاز جمیکا سے تعلق رکھنے والی 2019 کی فاتح ٹونی این سنگھ نے پہنایا۔ مس ورلڈ کی ویب سائٹ کے مطابق 23 سالہ کیرولینا جو اس وقت مینجمنٹ میں ماسٹرز کی ڈگری حاصل کر رہی ہیں اور پی ایچ ڈی بھی کرنے کا ارادہ رکھتی ہیں لیکن فی الحال کیرولینا ایک ماڈل کے طور پر کام کرتے ہوئے ایک حوصلہ افزا اسپیکر بننے کی امید رکھتی ہیں۔

واضح رہے کہ 2020 کی طرح مس ورلڈ 2021 مقابلے کا بھی پروگرام کورونا کے باعث گزشتہ سال دسمبر میں  عارضی طورپر ملتوی کر دیا گیا تھا، اس وقت اعلان کیا گیا کہ مس ورلڈ 2021 مقابلے کا ایونٹ اگلے 90 دن میں پورٹو ریکو میں منعقد ہوگا۔