پسنی: دہشتگردوں کا فورسز پر حملہ، کیپٹن اور سپاہی شہید

بلوچستان کے ضلع گوادر کے شہر پسنی کے قریب دہشت گردوں نے سیکیورٹی فورسز پر آئی ای ڈی کے حملے میں افسر سمیت 2 سیکیورٹی اہل کار شہید ہوگئے۔

پاک فوج کے شعبہ تعلقاتِ عامہ (آئی ایس پی آر) کے مطابق حملے میں کیپٹن عفان مسعود اور ایک سپاہی بابر زمان شہید ہوئے ہیں۔ آئی ایس پی آر نے بتایا ہے کہ واقعے کے بعد پسنی کے قریب واقع خدا بخش بازار کے علاقے کو سیکیورٹی فورسز نے گھیرے میں لے رکھا ہے اور علاقے میں سرچ آپریشن جاری ہے۔

پاک فوج کے شعبہ تعلقاتِ عامہ کا مزید کہنا ہے کہ دشمن عناصر کے بزدلانہ حملوں سے بلوچستان کا امن سبوتاژ نہیں ہونے دیں گے۔ ترجمان کا یہ بھی کہنا ہے کہ سیکیورٹی فورسز دہشت گردوں کے عزائم ناکام بنانے کے لیے پر عزم ہیں۔

واضح رہے کہ اس سے قبل منگل 13 جولائی کو کرم کے علاقے میں سیکیورٹی فورسز اور دہشت گردوں کے درمیان جھڑے میں کیپٹن سمیت 2 سیکیورٹی اہل کار شہید ہوئے تھے۔ شہیدا کی شناخت کیپٹن باسط اور سپاہی حضرت بلال کے ناموں سے کی گئی تھی۔