وزیراعظم عمران خان نے پیٹرول کی قیمت 5.40 روپے فی لیٹر مہنگا کرنے کی منظوری دے دی۔
وزارت پیٹرولیم کی جانب سے پیٹرول کی قیمت میں 5 روپے 40 پیسے فی لیٹر اضافے کی منظوری دی گئی ہے۔ ڈیزل کی قیمت میں 2.54 روپے فی لیٹر، کیروسین کی قیمت میں 1.39 روپے فی لیٹر اور لائٹ ڈیزل کی قیمت میں 1.27 روپے فی لیٹر اضافے کی بھی منظوری دی گئی۔
عالمی منڈی میں گزشتہ کئی ماہ سے پیٹرولیم مصنوعات کی بڑھتی ہوئی قیمتوں کے پیش نظر اوگرا نے پیٹرول کی قیمت میں 11.40 روپے فی لیٹر اضافے کی تجویز گزشتہ روز 14 جولائی بدھ کو حکومت کو ارسال کی تھی۔
مائیکرو بلاگنگ سائٹ پر معاون خصوصی شہباز گل کا کہنا ہے کہ وزیرِاعظم نے اوگرا سفارشات کے برعکس عوامی مفاد میں پیٹرول کی قیمت میں محض 5.40 روپے فی لیٹر اضافے کی منظوری دی ہے۔
شہباز گل کا مزید کہنا تھا کہ اوگرا تجویز کے مطابق پیٹرول کی قیمتوں میں اضافہ نہ کرنے اور عوام کو زیادہ سے زیادہ ریلیف فراہم کرنے کی غرض سے کیے جانے والے اس فیصلے کے نتیجے میں پڑنے والا بوجھ حکومت خود برادشت کرے گی۔
Discussion about this post